Ab Bhi Yaad Hai Wo Pal... (Poetry)...

This was penned down by me a few years back. 

My thoughts on how things have changed over the years... here it goes...


Ab bhi yaad hai wo pal...
jab waqt ki hoti thi pabandi...
jab kitabon se hoti thi razamandi...
na thi koi apni aazadi...
phir bhi khwab dekha karte the hum...
ki ek roz chhuenge bulandi..

zindagi thi itni khubsurat...
garmiyon ki chuttiyyan lagti thi zannat...
pehli baarish ka tha kuch aur nasha...
sardiyon ki dhoop lati thi muskurahat...
papa se milti thi maar..
mummy deti thi dular...
behen ki rakhi kalai par..
bhai se mili sujhan aankhon per...

doston ke saath bitaye har wo pal..
kabhi ki masti, kabhi ki nakal..
kabhi phode sheeshe to kabhi tode table...
lekin thi aisi yaari... jo ki jaan se bhi pyari..
bina ek phone ke sab ho jate the ekathe...
aur karte the baatein ghanto baithe baithe...
na poochte the...tu nikla ki nahin..
phir bhi ye rehta tha yakin..
ki aa jayega wo, thode der mein hi sahi...

tv per ek hi tha doordarshan..
hota tha bharpur manoranjan...
wo rangoli ke sunhare rang...
phir chal diye mahabharat ke sang...
shaam ko hasayein tom n jerry...
phir surabhi ke baad sone ki taiyari...

150 ki thi shirt, 200 ke the jute..
man ko wo khoob the bhate...
yaad nahin wo kaunse the brand..
aas-paas ke logon se thi pehchan...
padosi na hote the anjaan...
sabhi hote the apne
ram ho ya ho rehman...

nahin lautenge wo pal...
tu chalta ja raha hai aur chal aur chal...
kabhi samay mile to palat ke dekh..
kya chooth gaya hai aur kya hai baki...
ac ne saare mausam bhula diye...
traffic ne khoon ke aasun rula diye..
2000 ke shirt bhi nahin ab bhaate..
5 min der ho jaye to call pe call kiye jaate...
online friend se hoti hai ghanton baat...
per nahin malum dost ke kya hai halaat...

umeed hai ki ho jaye ek gaadi, ek ghar..
wo bhi bank loan per...
salary ho 7 figures mein...
ya mile onsite ka offer...

na hai ab papa ki maar,
mummy ki rahegi hamesha dular...
behen bhi ab e-Rakhi hai bhejti...
bhai se baat hoti kabhi-kabaar…

mana ki ab khoob ho kamate…
salary ho gayi hai 8 figure..
onsite ke ho chuke kai chakkar…
Ho gayi hai ab gaadi aur ghar..
Sab kuch to hai per nahin hai chain..
Karte hain har pal be-chain…
Kabhi Share market to kabhi bank loan…

Kya yehi hai zindagi to tum jee rahe ho…
Kabhi jhaank ke dekho kya hain haalat…
Technology ne pee liye saare jazbaat..
Chaaron taraf hai faili kitni mayusi…
Le aao kisi ek chehre per hasi…
Ho jaoge tum apne kaam me kamyaab…
Per apne aap ko kya doge jawab..
Kya sahi mein hum itne hain khudgarz..
Main aur sirf main bas yehi hai soch…

na hai ab koi pabandi...
kitabon se bhi nahin hai razamandi...
ab to puri hai azadi...
per kya chu paye ho bulandi???

Author – Deepak Ray
Date – 05/10/2012